Da∙ororo dingtang dingtang a∙songo aro a∙dokrango so∙sojengjeng ong∙ani gisepo, sima ari jolrangita niamgri napsrukbaanirangko champengsona a∙dok sorkari ja∙kurangko de∙e nirokaniko dakangenga aro a∙dokko naljokatna ka∙enggipa kamrangni bidingoba chu∙gimik talataniko Chief Minister Conrad Sangma Assembly-o on∙angaha.
Indake napsrukbaaniko champengsona sorkari dingtang mancha a∙dok aro ma∙mongni gadango tom∙anirangko changnichang ka∙ange BSF, Army, Air Force aro Intelligence Bureau baksa bakrime kam ka∙anikoba parakataha. Sima ari jolrango mai mancha ong∙enganikoba name dake am∙sandie nirokaniko dakange ma∙mang sorkari baksa jringnan tom∙e chanchirimangenga jekon dal∙batgipa gadangona report rangkoba sokatenga ineba Chief Minister aganangaha.
Ia kam ka∙anirango a∙doktang aro songrangni manderang baksa bakrime kam ka·anikoba aganangaha. Badiaba songrang jeon simsakna nangbatgipa jolrango songni sordar aro manderang baksa Deputy Commissioner tom∙anirangko ong∙atenga. Gipin biaprangoni napbagipa manderangko sing∙sandie lekka pancharangko niroke kam ka∙nagitaba checkpoint aro entry point rangkoba highway rango a∙bachengataha ine Chief Minister talatangaha.
