Garo Hills Autonomous District Council (GHADC)-o kam ka·enggiparangna ja 44 ni dormaharangko on·a man·gijani gisepo mikkangchi kam ka·anirangko aro ia ong·enggipa obostaoni naljokatna ja·ku de·na da·al salo dingtang mancha Council ni Executive Committee (EC) aro a·dokni seokgipa Sub-Committee Tura Circuit House-o tom·e chanchirimaniko dakangaha.
Ia chanchirimanio maikai Council-o chagrongenggipa neng·nikanirangko bon·atna a·dok sorkari baksa kamrangko ka·angna manchie tom·angaha. Ian ja 44 ni dormaharangko on·a man·gijani bidingo ong·a aro a·dok sorkarini bailout package-ko on·e November jaoni dormaharangko on·angna tik ka·ani gimin mongsongbate chanchirimangaha.
Ia Sub-Committee (SC) ko West Garo Hills ni Deputy Commissioner Vibhor Aggarwal dilangaha jeon toromni dilgiparang jekai Father Januarius Sangma, Rev Frithing D. Sangma baksa Member Secretary W. Sangma (ADC) aro Charming N. Sangma (Retd. MCS) ba dongpae GHADC-ni CEM Albinush R. Marak, Deputy CEM Nikam Ch. Marak aro gipin EC member-rangming ia tom·anio chanchirimangaha.
Da·alni tom·anian mikkangchina nambataniko ra·bana skanggipa ja·ku de·ani ong·a ine CEM Albinush Marak aganangaha. Dormaharangko aro a·dok sorkarini bailout package ko on·a miksonganikoba re·baenggipa sal somoirango changnichang tom·taie ja·kuko de·anggen ineba aganangaha.
Ia Sub-Committee ni daito-ara bailout package ni ke·a ke·janiko nigrikna, baikamgipa cholon bewal ba niamrangko tarina ku·pattina, aro dormaharangko on·aniko nirokna Principal Secretary ni gadango kam ka·gipako rakkiana ong·a ine Deputy Commissioner Vibhor Aggarwal aganangaha. Mikkangchi je namdapatani kamrangko a·bachengatna Council baksa chanchirime aro nangnikanio pangchakesa ia Sub-Committee nigrike kamko ka·anggen ineba u·iatangaha. Unbaksanaba uamang seokgimin MDC, gazetted officer-rang aro Council-o kam ka·enggiparang baksa chanchirime sal 45 ni gisepo ku·pattianirangko on·anggen.
Indakgipa neng·nikanirangko chagrongani gisepo Garo Hills-o songdongenggipa manderangko apsan nangrime tom·tomaniko rakkina nanganiko toromni dilgiparang Father Januarius Sangma aro Reverend Frithing D. Sangma ku·pattianiko on·angaha.
