India aro US ni gisepo dingtang dingtang bosturangko bading chiwalani bidingo meligrikjae adita neng∙nikanirangko chagrongangenga. Indake ong∙engon, a∙song ge∙gni-ni gisepo name dake golpogrikanirangko dakangenga ine US ni President Donald Trump aganangan baksana Prime Minister Narendra Modi uni namgipa ripeng ong∙a ineba janapange uamang ru∙utgijani somoion golpogrike chu∙sokgipa ong∙na ka∙dongsoenga ine Budbar salo u∙iatangaha.
US President ni agangipa kattarangna, “India aro US meligipa ripeng aro ong∙telaigipa dol ong∙a” ine Modi aganangskae re∙baenggipa sal somoirango Trump baksa golpogrike bading chiwalaniko aro meligrikaniko mangrakbatatna kamrangko ka∙anga ka∙dongsoaniko parakangaha.
Koborrangko man∙soanigitade, Ukraine-o ong∙enggipa obostani bidingo Washington-o US aro European Union (EU) baksa Trump-ni tom∙aniko dakdilanio Russia ni President Vladimir Putin ko sinjetaniko on∙a India aro China ni kosako 100% tariff ko ra∙gatna EU ko didiangaha ine u∙ina man∙soaha. Re∙anggipa August 27 tarikonin, India-ni bosturangko US-o 50% tariff rangko ra∙gataniko nikna man∙angaha jean Russia a∙songoniko to-ko ra∙ani bidingo indakgipa ja∙kuko India-ni kosako de∙angenga.
