Tura Medical College-ko Public Private Partnership (PPP) mode dakani bidingo re∙anggipa August 29 tariko Tura Circuit House-o Chief Minister Conrad Sangma baksa tom∙e chanchirimanio MBBS chatro saksani agangipa kattarangna NPYF dolni matnangatgipako RIMS Imphal-ni Meghalaya Medical Students Association raken jegalataha.
India a∙songni constitution-o article 19 (1) (a) ni ning∙o darang songdonggiparang Right to Freedom of Speech & Expression-ko jakkalna man∙a ine uamang janapataha. Chatro chatrirang ong∙e da∙o Tura Medical College-ko PPP mode-o chalaiani bidingo ia bilko jakkale agana man∙a. NPYF dolni saksa chatroni agangipa kattarangko kraa ong∙ja ine agananiara jakgittelgipa a∙songo ku∙rang on∙aniko sinjetna jotton ka∙ani ong∙a.
Unikoa Article 21-o janapgimin Right to Life & Liberty-nigita mikkangchini namgnina aro a∙doko sanna bannaniko namdapatna darangan an∙tangni nangnikaniko maming champengani gri agan talatna man∙a. Uni gimin ia chatroni agangipa kattarangara maming namgijagipa aro chonnik ontekani ong∙ja batesa constitution-o on∙gimin bil ong∙a ine NPYF dolni kema bi∙na agangipa kattarangko Meghalaya Medical Students Association, RIMS Imphal jegalataha.
