South West Garo Hills a·jao skigiparangni songsalna on·gilaniko mande ra·e Teachers’ Day-ko da·al salo katchabee Ampati MFC-o maniangaha.
Maniani bako sakgittam skigiparangna uamangni bimchipe aro on·kange bida pakwatani a·bao dangdike on·anina District Awards 2025-ko on·angaha. Ia award-ko Nogorpara Deficit Secondary School-ni Headmaster Albinson Marak, Secondary gadango, Ampati Deficit UP School-ni Headmaster Vinco Ch. Marak, Upper Primary gadango aro Majherchar Girls’ Govt LP School-ni Head Teacher Sahanaj Begum Lower Primary gadango man·angaha.
Teacher’s Day-ko manianiona Rangsakona MLA aro KVIB-ni Chairman Subir Marak mongsonggipa ong·e sokbaaha. Marak an·tangan saksa Garobadha sepango donggipa Nirupama Memorial Secondary School-ko chalaigipa ong·a. Bang·bata manderangni skigipani kamko chol ong·jae bon·kamao seokanina suk ong·gijaniko Marak uni agananio parakaha. Skiani a·bako namdapatna skigiparangko mangrakbatatna nangani gamchatanikoba ua mongsonggipa ong·e ra·china didiangaha.
Deputy Commissioner, South West Garo Hills, Hema Nayak-ba ia maniona sokbaaha aro ua skigiparangni chotchanggija ning·tubegipa songadam nokadamrango dangdike on·anina de·mittelangaha.
DSEO, Ampati, Emphul Ch Marak, SDSEO, Ampati Taposh Ch. Marak, BMC, Betasing, Senora N. Sangma aro award man·gipa saksa skigipaba ia manianio aganangaha. Maniani bako an·saotnagita aro uamangni skigiparangko mande ra·aniko mesokagita chatro chatrirang gitrangko ring·e, chrok mesae aro bidani gamchatani bidingo drama dakangaha.
