A·doko re·baenggipa assembly election-o BJP dol 20-30 biaprango chena ka·donganiko saksa dilgipa aro cabinet minister AL Hek aganangaha. Meghalaya a·doko ia seat-rangko chena party-ni bilakaosan pangchakaigija candidate-ni cholon bewal aro gunoba pangchakgen ine Hek parakataha.
Re·baenggipa GHADC election-o uamangni chotchanggija kam ka·anichi BJP dol manderangoniko ka·donganiko man·gen ine Hek aganaha. BJP ge·sa konta 24 kam ka·gipa dol ong·a jean bimchipe manderangni namgnina dangdike on·enga ine Hek aganangaha. Re·anggipa chango Tura-ni MDC Bernard Marak-ni gipin a·dokoniko dakchakaniko am·ani bidingo sing·on dakchakaniko am·anio maming namgijani dongja ine ua aganangskaaha.
Christian-rangni kosako sinjetaniko janapengon ia kamrango badiaba dolrang jak dongna gnang, niatgenchimode bang·bata changon social media-rango tarie BJP-ko namgija bimingrangko on·e matnangronga ine Hek aganangaha.
Namgijagipa politics-ko kal·ani bidingo sing·on, darang party-an an·tangtangni namgnina kragijagipa kamrang ka·aniko ua janapataha. BJP dolba gipin dolrangni kosako apsankon dakenga aro uandake gipinrangba BJP-ni kosako iakon dakskaenga ine Hek agandapangaha.
