West Garo Hills-ni Anti Narcotics Task Force (ANTF) dolrang kakketgipa koborko man·soe, Phulbari PS-ni ning·o man·gipa Shyamding songni nok ge·saona re·ange am·sandiangaha. Uamangni am·sandianio ge 85 chonchongipa bottle-rangni ning·o rimitsrigipa powder-rangko chipe dongipako man·aha jekon heroin drugs ong·a ine parakataha.
Unbaksana gas cylinder-ko tarie ning·o donnugipa sabon bikap ge·gnioni heroin, gong 1,96,601 tangka paisarang, adita sonani bosturang, mobile phone ge·gni aro ge 134 kali bottle-rangkoba man·aha. Man·gimin bosturangko ua biapon porikka ra·e niangaha aro ua pekatgipa bostu heroin ine ma·sinagita man·aha. Uamangoniko man·gipa heroin-rang chu·gimik 30.58 gram ong·a jekon niamo pangchake jinmani nikaon ANTF dolrang chipe ra·angaha.
Ua nokoniko chu·gimik sak 3 jakko donggiparangko rim·aha jemangan Shyamding songni Khaibar Ali, Nur Zaman aro Moriom Bibi ong·a. Rim·ako man·gipa manderangko NDPS Act-o pangchake da·al salni bako Tura Court-ona watataha ine police dolrang parakataha.
