Tura Circuit House-o Garo Hills Autonomous District Council (GHADC)-o tangka paisarangna neng·nikanina aro Tura Medical College-ko PPP mode-o chalaina am·ani bidingo NGO-rang, songni dilgiparang aro songdongenggipa manderang baksa tom·e chanchirimanio medical na poraienggipa saksa chatro-ni Chief Minister-ko mande ra·gija aganchakgipa kattarangko National People’s Youth Front (NPYF)-ni Working President Anclucis Marak ni September 4 tariko matnange songbad rango gatataniko Meghalaya Pradesh Youth Congress (MPYC) jegalangaha. MPYC ni agananigitade, GHADC aro Tura Medical College ni bidingo jingjengatanirangko olgrokatani pal NPYF-ni saksa chatroni uni u∙i ma∙sianiko parakanggipako indake matnanganiara kragipa ong∙ja ine aganangaha.
Democracy-o manderang sorkarini kamrangko sing∙dona name manchaan bil donga aro uamangni ia chatroni kosako indake matnanganiara chadambe aro manderangni ku∙rang on∙aniko champengani ong∙chongmota ine MPYC janapangaha. NPYF ni ia ja∙kuko de∙aniara party ni dilgiparangna warachaknasa skanggipa daitoko ra∙a ine nikna man∙a indiba manderangni neng∙nikaniko aro nangnikaniko dal∙e ra∙gijanikoba mesokanga ineba aganangaha.
Uamang dingtang mancha manderangna kam ka∙gipa ong∙genchimode, batanggimin somoio Williamnagar-o ong∙anggipa obosta aro Rajasimla-o bi∙sa saksani gimagipako name dake am∙sandianirangko dakanggenchim ine MPYC matnangataha. Ia ong∙anggipa obostarango ga∙akgiparangna da∙ona kingkingba kakketgipa bichalko on∙a man∙kujani gisepo indake poraienggipa chatroni kosako matnanganiara kragipa ong∙ja ineba parakangaha.
Songsalni dilgiparangko aro senior citizen rangko mande ra∙aniko mesokaniara uamangni nangnikanirangko knachakna nangchongmota. Party tang mangmangko dal∙nike ra∙aniara kragipa ong∙chongmotja aro NPYF dolrang mikkangchi manderangna dangdike on∙anio uamangni ku∙rang rangkoba knachakna nanga ine MPYC janapangaha.
