Batanggimin 2008 bilsio Lower primary school-ni skigiparangna niamni a∙palo kamna rimnapanio Cabinet Minister Ampareen Lyngdoh, Elementary and Mass Education-ni gitcham Director J D Sangma aro gitcham Deputy Director Ameka Lyngdoh jak dongpaa ine badi ka·aniko Bristibar salo Meghalaya High Court ra·chakgijaniko rai on∙angaha aro indakgipa kamo uamang maming dakeba bak dongja ine parakataha.
Central Bureau of Investigation (CBI), 2011 bilsio FIR ka·gimin-o pangchake 2018 bilsio badi ka·aniko segatangaha. Ia skigipani kamrangna rimnapanio man·gimin mark rango white ink ba kali gipokchi sriksrik nongdape bang·a candidate-rangna dakchake on·angaha ine Ampareen Lyngdoh ni kosako badi ka∙angaha. Ia kamna rimnapaniko dam bonga centre-rang ba Sub-Division-rang jekai Shillong, Jowai, Amlarem, Tura aro Dadenggre-rango dakangaha ine matnangataha.
Uamang sakgittam-ni kosako badi ka·gipa lekka pancharangko kakket ong·e mesokna man·gijaniko aro tarigimin lekkarangni result-rango sak bonga manderangni apsan soi ka·e jakkalaniko court name dake nianiko dakaha ine Chief Justice IP Mukerji aganangaha. 2008 bilsio skigiparangni kamna rimnapaniko dakanganina badi ka·gimin bilsi 17 ong·pilaha jekon court-nigita section 482-o pangchake kakket bichalko on·angna kamko ka·anggenchimoba dosi donganina matnanganiko man·gipa mandeni kosako maming sakkiko man·jaha aro sakkirangko on·a sak 181 oni sak 28 san sakki on·a gita court-ona re·baaiaha ine Chief Justice IP Mukerji agandapangaha.
Ia case-ko cheani ja∙mano, Lyngdoh uni bilsi 17 na saknaaniko chakna nanganiko parakange dingtang mancha uni mittelpilaniko aro ritchenganiko man∙aniko katchabee kobor ra∙timgiparangna parakangaha.
