Damal A·sim police thanani ning·o man·gipa Manggakgre songo so·otanio jak donggipa sakbri kate dongenggipa manderangko West Garo Hills police dol rim·na man·aha.
Re·anggipa bilsini September 12 tariko Walistone B. Marak-ni bi·sa Karak N. Sangma-ko ma·sina man·gijagipa manderang so·otenba Manggakgre songni ramasamo gale donangaha. Ia mamlani bidingo Damal A·sim police thanao mokor domako segatenba sing·sandianiko dakangaha.
Dontonggija am·sandianiko dakanichi so·otanio jak donggipa sak 3 manderangko mijal salo Manggakgre songoniko rim·na man·aha. Ia manderang pre-arrest bail ba rim·na skang bail ra·na dabiaha jekon District & Sessions Judge Tura ra·chakjaha. Ua salonin uamang kate dongaha ine parakataha. Mijalo rim·a man·gipa manderanga Tinet B. Marak, Pringsbirth N. Sangma aro Donath N. Sangma ong·a.
Uamangko rim·ani ja·mano koborrangko man·e so·otanio jak donggipa brigipa mande Dilax Sangma-koba Manggakgre songonikon mijal salo rim·na man·angaha. Iamang sakbrikon da·al salo Tura District Court-ona rimbaaha.
