A∙songni skotong songjinma New Delhi-o a∙dokni nangchongmotgipa kamrangni bidingo Chief Minister Conrad Sangma, Union Home Minister Amit Shah ko gronge chanchirimangaha. Ia tom∙anio ming bri kamrangni bidingo CM agantalate on∙e Union Minister ko chu∙sokate on∙china didiangaha.
Skanggipao, Meghalaya a∙dokna dingtang mancha cadre rangko bikote on∙china dabiangaha jean da∙o dipet Assam baksasa joint cadre ong∙enga. Gnigipao, Khasi aro Garo ku∙sikko Eighth Schedule-o napatchinaba mol∙molangaha.
Gittamgipao, Meghalaya a∙dokni manderangni indita bilsirangna dabienggipa Inner Line Permit (ILP) ko ra∙gatani bidingoba ia tom∙anio janapangaha. Bon∙kame, Lok Sabha ni gitcham Speaker P A. Sangma niksenggipa dilgiparangoni saksa ong∙ani gimin uko mande ra∙agita New Delhi-o donggipa rama dilsako uni bimungchi mingangchinaba didiangaha.
