Tura, September 5 tarik 2025: 64 gipa Teachers’ Day ba Skigiparangni Sal ko da·alo District Auditorium Tura o maniangaha. Ia manianiko West Garo Hills a·jani Department of Education a·jao pilak skigipa ong·e kamko ka·enggiparangko mande ra·aniko dakna gita ong·atangaha.
Ia tom·aniona West Garo Hills a·jani Deputy Commissioner Vibhor Aggarwal, IAS mongsonggipa sokgipa ong·e bakko ra·angaha. Apsan dake ia somoio Tura ni Additional DSEL, Ruby Z. Das; DSEO R. T. K. Sangma, SDSEO Bardy A. Sangma aro bang·a skigiparang aro chatro chatrirangba tom·bimonganio bakko ra·angaha.
64 gipa Skigiparangni Salko manianio mongsonggipa sokgipa Deputy Commissioner Vibhor Aggarwal somoiko ra·e aganengon, skigiparang songsalko aro a·songko rikanio mongsonggipa manderang ong·a aro chatro chatrirangni gnigipa pagipa ma·giparang ong·e chatro chatrirangni gisikona seng·aniko aro uamangni bewalrangko niroke skie on·bagipa ong·a ine aganangaha. Indake ia dalbegipa salko maniengon Deputy Commissioner, songsal aro a·jao pilak skigiparangko uamangni bimchipe aro kakket ong·e gisik ka·tong gimikchi dangdike on·anina mittelangaha.
Tom·bimongani bako Dr. Sarvepalli Radhakrishnan ko gisik ra·nagita kan·dikgipa jawilwatkoba mesokaniko dakangaha. Una agreba da·al salo dingtang mancha West Garo Hills a·jani sak 5 skigiparangko Certificate aro boksis rangko on·enba mande ra·anikoba dakangaha jemangan Dalu, Damalgre L.P. School ni Headmaster Sorash R. Marak; Anogre, Perennial Upper Primary School ni Headmistress Luckyrina A. Sangma, Tura, Christian Girls’ Higher Secondary School ni Assistant Teacher Nishita Saha; Rongkon Baden Powell Memorial L.P. School ni Guide Taringchi S. Sangma aro Tura Public School ni Art & Craft Teacher aro Scout Master Bikromjit A. Sangma ong·a.
Bon·kamao sokbagipa sakantian Teachers’ Anthem ko ring·enba ia tom·bimonganiko matchotataha.
