Tura Medical College (TMC)-ko Public-Private Partnership (PPP) dakatna am·enganiko AHAM CEB H.Q Tura-ni President Georgeprince Momin jegalenba Chief Minister Conrad Sangma-na memorandum-ko on·angaha. Re·anggipa May 17 tarik 2025-o PPP mode-o chalaina miksonge Expression of Interest (EOI)-ni chittio parakataniko chang·satai nipiltaichinaba Momin Chief Minister-ko mol·molataha.
Tura Medical College-ko PPP-ni ning·o chalaigenchimode Meghalaya-ni chatro chatrirangna seat-rangko komiatgen ine Momin parakataha. Section 3.12.8.11 EOI-ni chittio Private Sector Entity (PSE) MBBS seat-rangko state reservation aro domicile policy-rango pangchake komibegipa 50% ko State Government Quota-o on·china aro Meghalaya State Counselling Authority counselling-nigita gapatchina parakataha.
Unikoa, Para III-o parakatgipao sorkari bilsi 33-na a·ana lease-ko on·a aro gipin bilsi 33 na bakroatna agani gnang jean bilsiprako lease rental crore-sako on·a tik ka·giminni kosako ong·a. Para III-o pangchake ia college-ko chalaina sorkari bilsi 66 mangna PSE-na on·a miksongani gnang ine Momin parakataha.
Ia college-o bilsisao chu·gimik 150 MBBS seat-rangko on·a tik ka·aha. PPP mode-o college-ko chalaia ong·ode ia bilsi 66-o chu·gimik 4224 MBBS seat-rangkosan bikotna man·gen jean namen gimabeaniona sokgen. Garo Hills-o ia ge·sa mangmang medical College ong·engani gimin a·dok sorkari jako ra·e chalaigenchimode ia bilsi 66-o changgni chandime ge 8,448 seat-rangko man·skagen ine Momin aganangaha.
National Medical Council-ni niamo Faculty member, medical staff aro technical personnel-rangko kamo rakkiani bidingo PSE para (a) o janapatgipakoba Momin aganangaha. Iako dakanichi kamrango rimnapna PSE-na on·a miksonganiko mesoka. A·doko ia kamrangko ka·na bilsokgiparang dongjagenchimoba Meghalaya-ni medical staff aro technical personnel-rangkoba nichangna nangja aro State Reservation Policy-ko jarike a·doktangni manderangnan cholko on·a nanga ine Momin parakataha.
Meghalaya sorkarini Health & Family Welfare Department-ni 28 tarik October 2024 bilsio u·iatanigita PPP mode-chi chalaigipa P. A. Sangma International Medical College & Hospital-o state quota-o tuition fee ra·a bilsiprako gong 4,95,000 mang aro chu·gimik course-na gong 24,75,000 mang nanga. Apsandaken Tura Medical College-oba indake ra·genchimode Meghalaya-ni manderang mongsongbate Garorang baita ia tangkarangko gamsokgen ine Momin singangaha.
Da·alo a·dok sorkari Tura Medical College-ko chu·gimik sorkarichi chalaina man·janaba gnang. Nambatgipade ia college-ko chalaiani somoiko bilsi gnimangna ra·doataie aro budget-ko taritaie sorkari chu·gimik a·dok sorkarichi chalaianian ong·gen ine Momin parakataha. Meghalaya a·dokna da·o ma·mongni dakchakani donge namgipa chol ong·enga jean bilsi 50 batpiloba ia kamrang chu·sokjaha aro ia cholko jaktuatna nangja ine Momin didiataha.
Knalo ia college-ko chu·gimik sorkarichi chalaianiko nikna Momin ka·donganikoba parakataha. PSE-na jako ra·na ong·genchimode re·baenggipa bilsi 66-na kingking ia college uamang baksa niamgita songgigrikanichi PSE-ni jakon dongkamanggen. Da·alo namgipa ja·kuko ga·aniara ru·uta somoina ong·anggen aro a·dokni manderangni nangnikaniko niate mikkangchi bi·sarangna cholrangko niksamsoe on·angna Chief Minister-ko AHAM President Georgeprince Momin mol·molangaha.
