Garo Hills Autonomous District Council (GHADC)-o tangka paisarangnigita neng∙nikaniko man∙e kam ka∙giparangna ja 44 na kingking dormaharangko on∙na man∙kujaenganina Non-Gazetted Employees Association (NGEA) baksa Civil Society Organisations aro nangrimgimin NGO dolrang baksa dal∙begipa re∙jomaniko Bristibar salo Tura-o ong∙atangaha.
Ia re∙jomanio Garo Hills-ni a∙kitikbri manderang, school aro college-rangni chatro chatrirang, dingtang dingtang Nokmarang, GHADC-o kam ka∙giparang aro opposition dolni MDC rangba bakko ra∙angtokaha. Ia jingjengataniko William Point oni a∙bachengate Ringrey, District Maternity & Child Hospital, Babupara, Tura Bazaar, aro Hawakhana-gita re∙jomange bon∙kame GHADC office-o tom∙dakangaha.
Ia re∙jomanio bak ra∙anggipa manderang sea gnanggipa lekka plengrangko ra∙e, Executive Committee aro a∙dok sorkarini kosako uamangni ka∙donggijaniko mesoke dormaharangko ta∙raken on∙china chrik a∙bokangtokaha.
Indake EC ko chalaienggiparangni kosako ka∙donggijaniko man∙e Garo Hills o songdongenggipa manderang aro Council-o kam ka∙enggiparangni apsan bakrimaniko nikna man∙angaha. Mikkangchi uamangni dabianiko chu∙sokate on∙a man∙ja dipet uamangni jingjengtaniko dontongatkujawa ine NGEA aro NGO dolrang janapangaha.
