Autonomous District Council (ADC)-o kam ka·enggiparangna dormaharangko on·a a·dok sorkarini tik ka∙aniara niamni gita baditana kingking ra·chakna man∙gipa ong·gen ine Opposition-ni dilgipa Mukul Sangma sing∙doangaha.
Tangka paisarangko namdapataniko dakna Indian Constitution-ni niamo pangchake aro Finance Commission-ni bilo ge·etgiminsa ong·na nanga ine Mukul Sangma kobor ra∙timgiparangna parakangaha. Sorkari jekoba dakengon an·tangni dakna sikaniko chanchie chu·sokatani ong·ja indiba India-ni ge·etgimin niamosa ong·na nanga ine Sangma aganangaha.
A·dok sorkari re·baenggipa November 1 tarik 2025-oni GHADC-o kam ka·enggiparangna dormaharangko on·angna tik ka·aniara ADC-rangni niamrangko pe·ani ong·enga. Iako dakna skang a·dok sorkari ADC-rang baksa ku·monge chanchirimaniko dakchengahama? ma ian “hidden agenda” ba kattarangko donudape ADC-rangko bilakatani pal be·gruatna jotton ka·engama ine Mukul Sangma sing∙doaniko dakangaha.
GHADC-o kam ka·enggiparangna ja 44-na dormaharangko on·a man·kujaniara sorkarini daito ra·e jotton ka·jani a·selsa ong·enga ine Mukul Sangma matnange aganangaha.
