North Garo Hills Resubelpera-ni ning·o donggipa Khaldang Ad-hoc Upper Primary School-o skigipani kamko ka·enggipako niamgri kam oniko ra·galanina Tatu R Marak, Meghalaya Human Rights Commission-ni Chairperson Justice T Vaiphei-na chittiko sedoataha.
Khaldang Songma-ni Kiljon K Sangma-ko School-ni managing committee-rang baksa maming dakeba tom·e chanchiani gri School-ni Headmaster aro Resubelpara-ni SDSEO W G Momin, kam oniko ra·gale gal·aha ine chittio janapataha.
Sangma be·en bimangni gita saknaaniko man·genchimoba Khaldang Ad-hoc Upper Primary School-o ru·uta bilsirangonin dangdike on·enga. Indake niamgri kam-oniko ra·gale galanichi nokdangko saksan chalaigipa ong·e neng·nikanirangko man·an baksa an·tangko sanna bannaniko ra·na gitaba man·jaenga ine Kiljon Sangma-ni depantegipa Tatu R Marak aganangaha.
Uni gimin ia pilak neng·nikanirangko nirokate am·sandianiko dake kakket bichalko on·an baksana tangka paisarangko gama·atchina Meghalaya Human Rights Commission-ni Chairperson-o mol·molangaha.
