South West Garo Hills a·jani District Executive Force dolrang sorkarini aro manderangni bosturangko cha·uanio jak donggiparangko rim·na man·aha.
Re·anggipa August 29 tariko South West Garo Hills SP Vikash Varma, Assam-ni Police dolrang baksa bakrime Mankachar-o donggipa sima ari jolrangoniko am·sandianiko dakangaha. Uamangni bimchipe am·sandianio Thakuranbari songoni bilsi 43 ong·gipa Iftakul Islam-ko rim·na man·aha.
Ia rim·a man·gipa mandeni re·dile mesoke on·anio uni nokjamonikon cha·ugimin bosturang jekai battery rang, copper wire ba siliting, bol ratna jakkalgipa kol aro dingtang dingtang bosturangko man·aha jekon Ampati police thanao mokor doma segatgiminrang ong·na chanchichipani gnang. Sandianiko dakani somoio bosturangko salrurana jakkalgipa pick up garikoba police dolrang chipe donataha.
District Executive Force-ni am·sandiani dakanio gipin sakgni jak donggipa manderang Amirul Islam (23) aro Shahidul Islam (26) ko da·al salni bakko rim·na man·angaha. Ia manderangoniko adita cha·ugimin bosturangko man·aha.
Rim·a man·gipa manderangko ge·sa cha·urakgipa doloni ong·a ine u·ina man·aha jean Garo Hills-ni dingtang dingtang bakrangoni aro Mankachar joloni chalaigiparang ong·a. Ia manderang sorkarini chate on·gipa aro bang·a nokrangoniko bosturangko cha·ugipa dol ong·a.
