Da·al salni bako East Garo Hills a·jani Wlliamnagar, Rongrenggre skulni kal·chakram bakrao Lt. P A. Sangma-ni 78-gipa atchiani sal aro NPP dolni 13-gipa Foundation Day-ko maniangaha. Ia tom·aniona Northeast-ni dingtang dingtang a·jaoni dilgiparang, NPP-ni mongsonggipa manderang, jatni doka dam·gipa dolrang aro NE a·jani dingtang dingtang biaprangoni manderang ku·cholsan ong·e sokbae bakko ra·angaha.
Ia dal·gipa manianiko ring·susagrikanichi a·bachengataha, unikoa joljol Coffee Table Book-ko oprakangaha aro P A. Sangma-ni photo gallery-ko nokdongae on·angaha.
Tom·bimongani bako Lt. P A. Sangma-ko mande ra·aniko dakangan baksana uko gisik ra·nagita demittelani video-koba mesokangaha aro peodoko poraiae on·angaha. Ia manianio uni jikgipa Soradini K. Sangma-koba dingtang mancha mande ra·aniko dakangaha. Una agreba kal·susaani ba uan dake dingtang dingtang a·bao jat, a·dok aro a·jana mikkim rasongko ra·bagipa chadambe pante me·trarangnaba P A. Sangma Achiever’s Award-ko on·e NPP dolni palo mande ra·aniko dakangjolaha.
Da·al salni ia tom·bimonganio Thangwang Wangham, State President of NPP Arunachal Pradesh, W.R. Kharlukhi, Rajya Sabha MP, Sniawbhalang Dhar, Deputy Chief Minister, Meghalaya, Thomas A. Sangma, Speaker, Meghalaya Legislative Assembly, Conrad K. Sangma, National President of NPP aro a·dokni Chief Minister aro gipin mongsonggipa manderangba sokbae bakko ra·angaha.
Da·al attamo bang·a jatni dakmesokani ring·a dam·anirangko nikangna man·aha jeon Arunachal Pradesh, Manipur, Khasi Hills, Nagaland, Jaintia Hills aro Padmashree Silbi Passah-ba an·tangni chang·a sapaniko dakmesoke on·angaha. Una agreba Da Suraka, Rush & Trust, Balmanduri aro uandake gipin mingsingbegipa band rangni git ring·mesokaniko nikangaha.
Da·al salni tom·bimonganio P A. Sangma sagini janggi tanganiko aro A·chik a·songna aro Meghalaya a·dokna uni bimchipe dangdike on·aniko talatan baksa uni niksamsoaniko manderangna u·iatangaha.
