West Garo Hills, Dalu-oni paningsa chess kal·na changbegiparang chong·motan Silseng N. Marak aro uni demechik Nikgame G. Marak Andaman & Nicobar-o International Open FIDE Rated Chess Tournament 2025-ko Port Blair-o August 23-oni 28 tarikona ong·atanio paningsa sakgnian skanggipa biapo chebaaha.
Ia susaanio India, Sri Lanka, USA aro Nepal a·songrangoni chess kal·na changbegiparang susaangtokaha. Silseng Marak 1700 rating category-o skanggipa biapko cheaha aro demechikgipaba bilsi 13 ni ning·o ong·giparangni susaanio skanggipa biapon cheaha.
Batanggimin somoirangoba uamang paningsa state aro regional tournament-rango adita cheanirangkoba man·angaha. Uandake ia international gadango cheaniara uamangna aro Garo Hills-na mingsa rasongko ra·baani ong·aha.
