East Garo Hills, Williamnagar-ni DRDA Hall-ll-o “The quantum age begins: Potentials and Challenges” katta bichongko done salsana District Level Science Seminar-ko District School Education officer ong·atangaha.
Ia program-ona Additional Deputy Commissioner Ripamchi N Sangma mongsonggipa sokgipa ong·e bakko ra·angaha. Ia seminar-ona re·bae bakko ra·gipa a·jani dingtang dingtang school aro college-rango poraienggipa chatro chatrirangna technolgy-ni gimin u·ie ma·sie ra·aniko, chu·gimik ong·e a·gilsak gimikon technology-ko jakkale dingtang dingtang kamrangko skie ra·na man·aniko Additional Deputy Commissioner aganangaha.
Ia seminar-o a·jani dingtang dingtang school aro collage-rangni chatro chatrirang katta bichongo pangchake an·tangtangni tarigimin model-rangko aro salgimin noksarangko mesokangaha. Ia District Level Seminar-o seoka man·gipa chatro chatrirangko State level-ona watatgen ine District Science Supervisor (DSS) aro Sub-Divisional School Education officer (SDSEO) Samuel K Sangma aganangaha.
District School Education officer, S D Marak Technology-ni tang·doanio mongsonggipa ong·e kam ka∙na nanganirangko aro neng∙nikanirangko ma∙sina gamchataniko chatro chatrirangna aganangaha.
