Batanggimin somoio National People’s Party (NPP) dolona napanggipa sak 4 MLA rangko disqualify ka∙china Congress dolrang Meghalaya Assembly Speaker Thomas A Sangma na dorgastoko on∙angaha.
Meghalaya Pradesh Congress Committee (MPCC)-ni Secretary Manuel Badwar ni Assembly Speaker ni palo Assembly Commissioner and Secretary Andrew Simons na dorgastoko on∙anggipao janapanigitade dongimin niam jean two-third majority nanggipako uamang chu∙sokatjaha ine aganangaha.
Ian Constitution of India ni Tenth Schedule aro Meghalaya Legislative Assembly (Disqualification on Ground of Defection) Rules, 1988, para 2(1) jean Rule 6 ni ning∙o pangchake dorgastoko on∙angaha.
NPP dolona Celestine Lyngdoh (Umsning), Charles Marngar (Mawhati), Gabriel Wahlang (Nongstoin) August 19, 2024 tariko napangaha aro Mylliem ni MLA Ronnie V Lyngdoh July 30, 2025-o napangskaaha jekon uamangni NPP baksa chapaniko Assembly Speaker ra∙chakangaha.
Congress dolni dorgasto galaniko Speaker dingtang mancha nipiltaie rai ko on∙anggen aro Congress dolrang je rai on∙giminko ra∙chakna man∙jagenchimode court-ona doangskana man∙gen ine Simons aganangaha.
