A·doko SSA school-rangko nirokaniko a·dok sorkarina pakwatangskana tik ka·aniko ge hajal 3332 L.P aro U.P SSA school-rang namnike ra·chakaniko parakangaha. Education Department ru·utgijaan sak hajal 14 mang SSA school skigiparangni pay scale-ni ra·chakgimin gital bimangko on·aba tik ka·angaha. Ia kattarangko Meghalaya SSA Schools Association (MSSASA) ni President Aristotle C Rymbai, Education Department-ni Commissioner & Secretary in-charge Vijay Kumar Mantri baksa tom·ani ja·mano aganangaha.
Commissioner & Secretary baksa tom·anio uamang ming bri nangchongmotgipa bichongrangko janapaha chong·motan private ong·e chalaienggipa SSA school-rangko sorkarini ning·ao napatna, skigiparangni pay scale, SSA aro sorkari school-rang baksa chapdimatani aro school-rangko gipinona apjitataniko nirokna cabinet memorandum-ni bidingo talate on·angaha.
Hajal 5131 SSA school-oni hajal 3332 mang school-rang sorkarina nirokskachina pakwatna tik ka·aniko namnike on·atgipa NOC-rangko Education Department man·soaha ine Rymbai aganangaha. Ianoni ge 3034 schoo community-ni nirokgipa, 298 school-rang toromni aro private ong·e chalaienggiparang ong·a. SSA skigiparangni pay scale-ko tarienga aro assembly session-na skang finance department-na aro cabinet ra·chakna watatgen ine Commissioner & Secretary-ni agangipa kattarangna Rymbai kusi ong·anikoba parakangaha.
