United States of America-ni India a·songna 50% tariff-ko ra·na a·bachengatani salsa ja·man US President Donald Trump-ni advisor Peter Navarro, India 25% ko mingsa cholchi komiatna man·gen aro ian namen altubea ine aganangaha. Chong·motan uamang Russia-oni to breaniko dontongna nanggen aro danggrik dingrikgipa a·songko amatna dakchakna nanggen ine ua India baksa golporimaniko dakani bidingo sing·anina aganangaha.
India iako ra·chakna chinrangko mesokani bidingo sing·on da·o dipet uamangoni iani gimin maming janapatani dongkuja ine parakangaha.
India ge·sa ja·delgipa democracy ong·e aro bilsokgipa PM Modi-chi dilengoba dal·bea tariff-ko chilkuna ra·chakuenga. Changni chang golpoaniko dakoba ia kamrangchin uamang Russia-ni toko breangkuna namen tale parakatenga ine Navarro aganangaha. A·gilsako an·tangtangko tariff bang·gijagipa ine agangenchimoba uamangni a·songo tariff-rang namen gnang aro iako jegalna man·jawa ine ua aganangkuaha.
India, Russia-oniko komia damna torangko ra·e Russia-ni company-rang baksa melie taritaienba agilsakna dam rakbate palenga. Ia tangkarangara Russia-na Ukraine-ko dakgrikna on·agita ga·aka. Iani a·sel manderang sibatna nangenga jeon Ukraine aro Europe US-ona tangka paisanigita dakchakaniko am·na re·baskaa ine Navarro aganangaha. India-ni kamni a·sel gimikan gimaataona sokenga ine ua agandapangaha.
Ian Modi-ni dakgrikanisan ong·a. India-ni kamrang sakantina sa·dikataniko ra·baenga jekai bregiparangna, bading chiwalanina, kam ka·giparangna ong·a maina dal·bee tariff-rang kamrangko gimaataona, karkanarangko aro hajira man·gnirangko komiata ine Navarro aganangaha. America, Modi-ni dakgrikanina on·gilpana nange manderang kajinna gamdapna nangaona sokenga. Ian Modi-ni dakgrikaniba ong·paa ine ua aganangkuaha.
India-na agre pakma nie China-ni man·gnirangko gimaataona sokatskaani bidingoba uo sing·angaha. Ia sing·anina ua mongsonggipa ja·pangko Russia-ni toni bidingosa ong·a ine aganaha. China aro India, uamangni toko da·alo brejaha ong·ode knalo dakgrikani dontonggen. Pilakan, Europe a·songrangko man·chape Russia-ni toko brejaode Putin dakgrik dinggriknagita tangka paisarang chu·ongjawaha ine Navarro aganangkuaha.
Dakgrikaniko bakroatna Modi-ba bak dongpaa, ia tangkarangchi Ukraine-ni manderangko so·otna Russia a·song drone aro bomb-rangko breenga ine ua agandapangaha.
