A·ba Nok Dakopgre, Tura o Indian Institute of Public Health (IIPH), OMNIVEC-India baksa nangrime skanggipa changna Community Advisory Group (CAG) tom·aniko Community Engagement and Risk Communication (CERC) project nigita Budbar sal, August 27 tariko ong·atangaha.
CERC Project ian manderang baksa dingtang mancha meli-nangrime, digital platform rangko jakkalan baksana songsalni manderangko tom·chimonge ku·cholsan dengue aro malaria sabisiko champengna kam ka·enggipa onga. Iano digital platform rangko jakkalan baksana, songsalo donggipa manderangni gita sabisi rangni bidingo talatan baksana maikai sabisiko bon·atna aro champengsona man·aniko u·iatna kamrangko ka·angenga.
Tom·bimongani bako Malaria Technical Supervisor Marseng T. Sangma, malaria aro dengue sabisi ni bidingo adita talatanirangko aganangaha jekai maini a·sel ia sabisirangko man·enga, maidakgipa chinrang dongani aro maikai iarangko champengna man·ani bidingo talatanirangko on·eneba tom·aniko a·bachengdilangaha.
Ia tom·anio somoiko ra·e aganengon IIPHS ni Research Fellow, Suklang Malngiang, CERC Project ni bidingo talate on·angaha aro sorkarini 2016 bilsioni 2030 bilsiona National Framework for Malaria Elimination-o pangchake re·mikkangna am·aniko janapange iani miksonganiko jean 2030 bilsio India a·songo malaria ko bon·atna ja·ku de·ani ong·enga ine parakataha.
West Garo Hills a·jao survey ka·ani aro name dake am·sandianiako dakanio 50% ni gita manderang Dengue sabisini gimin name tale ma·sikujaniko aro champengani cholrangkoba u·ijani a·selba ia sabisi batrikrikenga ineba Suklang Malngiang parakangaha.
