West Garo Hills a·jao Phulbari, Chibinang-oni Tura-ona re·gipa km 63 ong·gipa ramako tarinagita ma·mong sorkari gong 1,200 crore batpile tangkarangko chamataha.
Ia ramako tarina chamataniko Ministry of Road Transport & Highways-ni Executive Engineer (NE) for DG (RD) & SS Vivek Anand Sharma, BJP state General Secretary Amitava Saha-na chitti seatani ja·mano parakataha. Ia ramani namgijani bidingo batanggimin July 8 tarikoba Saha ma·mong sorkarina chitti seatmanaha.
Ia Phulbari, Chibinang-oni Tura-ona tarinasigipa rama NH-127B ong·gen jean km 63 mang donga aro iako two lane tarian baksana ramani samtangtango adita biaprangko done tarigen ine Sharma u·iatangaha. Ia ramako tarina tangka paisarangko JICA-nigita pakage 2 dake on·anggen ineba ua aganaha.
Skanggipa package-chi km 31.50 mang bakroe tarigen jean gong 737 crore mang tangkani ong·gen aro gnigipa package-chi km 31.72 bakroe tarigen jean gong 504 crore tangkani ong·skagen. Ia ge·gni package-rangchi tarianio ia ramako 2027 bilsio matchotna ka·dongsoenga ine Sharma parakataha.
