Garo Hills Autonomous District Council (GHADC)-o kam ka·giparangna ja 43 ni dormaharangko on·a man·kujanina Non-Gazzeted Employees Association (NGEA) ni jingjengataniko A·chik a·songo songdonggipa manderang nikna man·enga. Iani gisepon re·anggipa August 25 tariko a·dok sorkarini gita GHADC na dormaharangko November 1 tarikoni jaantian on·a Chief Minister Conrad Sangma ku·chakangaha.
Indake ong·genchimoba NGEA ni dilgiparang aro opposition dolrang ia ja·ku de·aniko name dake ra·chakna man·kujawa ine janapaniko nikna man·aha aro a·dok sorkarini dormaharangko on·a ku·chakani gisepo iani bidingo name dake talbate ma·sina nangkuenga ineba janapangtokaha.
Deputy CEM Nikman Ch Marak ni agananigitade, batanggimin somoio GHADC, All party meeting ba pilak political party rang baksa tom·anio adita chanchirimanirangko dakangaha ine u·iatangaha. Ia tom·anio uamang State Finance Commission, ma·mong sorkari baksa ANVC aro ANVC-B ni Agreed Text of Settlement na tik ka·gimin aro bail-out package ni bidingo chanchirimangaha ine Deputy CEM parakataha.
Iarango pangchake uamang a·dok sorkari baksa chanchirimani ja·mano bail out package ko on·a ku·chake GHADC o kam ka·giparangna jaantian November jaoni dormaharangko on·a ku·chakaha ine Marak aganangaha. Iako aganengon, dormaharangko on·a tangka paisarangko GHADC ni kajina man·a nanggnioniko jakkalgija dingtang mancha State Finance nikosa jakkalangskagen ineba aganangaha. Ian Bodoland Territorial Council, Karbi Angling, Dima Hasao aro Tripura Autonomous Council rangna a·dok sorkarini tangka paisa chamatagita GHADC naba State Finance oniko mikkangchi chamatangna miksonganiko parakatangaha aro iani bidingo jajaanirang dongjachinaba Marak mol·molataha.
Backlog ba ja 43 ni man·a nanggipa dormahani gimin talatengon, iako dingtang mancha badia bilsioni dormaha gamna nanganirangko nitaipile District Council nigitasa bill rangko tarie watatgen ine Deputy CEM aganangaha. Unbaksana a·dok sorkarini Council na tangka chamatna ku·chakanichi maming dakeba Council ni bilko ra·sekgen ine matnanganiara kakketgipa ong·ja maina Autonomous body na a·dok sorkarinigita chamatna nanggipa tangka paisarangko sokatnade Constitution ni niamo pangchakgiminan ong·a ine janapangaha.
