August 28 tarik 2025: Tura Medical College, Shillong Medical College, sports ni a·bana rika cho·anirang aro Jal Jeevan Mission (JJM)-ni kamrangko nipiltaianiko dake namdapatna Chief Minister Conrad Sangma dingtang dingtang departmentrangni officer-rang baksa Tura-o tom·e da·al salo chanchirimangaha.
Tura Medical College-ko rika cho·anirang matchotnasienganiko aro Shillong Medical College-ko re·baenggipa 2026 bilsini September jaoni class-rangko a·bachengatna miksonganiko Chief Minister Conrad Sangma tom·anio parakangaha. Shillong, Tura aro USTM-rango chu·gimik ong·e class-rangko a·bachengatahaode Meghalaya a·doko sak 550 Doctor-rangko bilsiantian nakatatna man·a ka·dongsoe mikkangchi sanna bannaniko bilakbatatna aro namdapatna man·gen ineba CM agandapangaha.
Sports-na kal·chakram biaprangko songrango aro Block-rango rikna nanganiko janape mikkangchi tournament ba kal·susaani-rang jekai chess, athletics aro jatni kal·susaanirangko ong·atjringna miksonganikoba Conrad Sangma aganangaha.
Jal Jeevan Mission (JJM)-ni bidingo aganengon, ian 90%-ni gita kamrang matchotgenchimoba 20%-rangni gita nokdangrango chirangko man·kujaenga ine parakataha. Name dake am·sandianiko dake aro kamrangko namdapatna pilak nokdangrangko galchanggija ringani chirangko sokatna man·agita Functional Household Tap Connection (FHTC) audit-rangko ka·chinaba Chief Minister Conrad Sangma ge·etangaha.
Ia tom·aniko ong·ataniara dingtang mancha neng·nikanirangko ma·sie ra·e kamrangko namdapatna aro somoigita project rangko matchotatna miksongani ong·a ine CM parakangaha.
