West Garo Hills, District Mission Co-ordinator, Samagra Shiksha Abhiyan (SSA) (Memo No. SSA/WGH/Staff J&R/2018-19/PT-ll/184, dated 11th June 2025)-ni ning·o Block Resource Person (BRP) aro Cluster Resource Person (CRP)-ni kamrangna gipin jatrangko rimnapaniko A·chik State Peoples’ Front (ASPF) dolrang jegalangaha.
Name dake am·sandianiko dakon Selsella, Demdema aro Tikrikilla BRC-o gipin jatrangko kamna rakkianiko ma·sina man·aha ine NGO dol parakataha.
Ia kamna rakkigipa gipin jat candidate-rangko interview ra·aniko jinmana u·iatgija result-kosa joljol on·aniko dakanina ta·raken kamna rakkigimin gipin jatrangko kam-oniko ra·gale gitalgipa kamna rimnaptaianiko daktaichina dabiangaha. Indake kamna rimnapaniko dakengon, man·a kragipa A·chik jatni candidate rangna kamrangko on·china ASPF-ni Chief Organising Secretary Raksim R Marak, jako ra·enggipa District Mission Co-ordinator-o mol·molangaha.
