A·dok sorkariko dilenggipa Meghalaya Democratic Alliance (MDA) ko Leader of Opposition Dr. Mukul Sangma Purakhasia-o rally ka·mitingo matnangate, Garo Hills Autonomous District Council (GHADC)-o ong·enggipa obostarangko ta·raken namatchina dabiangaha.
Ia tom·anio Nokmarang, NGO-ni dilgiparang, senior citizen aro chadamberang bakko ra·angtokaha jeon Dr. Mukul a·dokni Chief Minister Conrad Sangma ni GHADC na ja 43 ni dormaharangko on·na nanganio sorkari maming jak dongja ine aganako raken jegalangaha. Constitution ni Article 275-o pangchake Scheduled Tribe rangni donggipa Scheduled Area rangna tangka paisanigita dakchakna aro bilakdapatna dongimin niam donga ine Dr. Mukul manderangna talate on·angaha. 2015-16 bilsio uni Chief Minister ong·e sorkariko re·dilanio tangka gong 100.17 crore rangko GHADC na dingtang mancha dakchakna chamataniko man·aha ine janapangaha.
Da·o rikenggipa sorkari ma·mong sorkarina Utilization Certificate rangko on·atna man·jani gimin gipin cholrangchi tangka paisarangko ra·bana man·dapjaenga ine aganan baksana GHADC ko namatpilna re·anggipa somoirango tangka jakkalsretaniko Lokayukta-o mokordoma ka·giminrangko ta·rakatna nanganikoba Sangma aganangaha. Una agreba State Finance Commission Act 2012 ko ra·gatgenchimode ma·mong sorkariniko tangka paisarangko man·dape GHADC ko nambate chalaina man·genchim ineba parakataha.
Agreed Text of Settlement-ko a·dok sorkari aro ma·mong sorkari baksa 2014 bilsio ka·gipa chu·sokate on·janinaba Dr. Mukul sorkariko matnangataha. Unbaksana Tura Medical College ko Public-Private Partnership (PPP) o chalaina amaniko Sangma raken jegalangaha maina sorkarichi chalaigipa college ong·genchimode sanna bannanirangko dam komia man·a cholko on·anggen aro kamna sandigiparangba adita cholko ra·bana dakchakanggen ine Dr. Mukul aganangaha.
