Garo Hills Autonomous District Council (GHADC)-o dormaharangko man·jaengani gimin jingjengatanirangko dakengani gisepon a·dokni Chief Minister Conrad Sangma politics kale bon·chipatna am·enga ine BJP-ni dilgipa aro Tura-ni MDC Bernard Marak matnangataha. Marak-ni matnange agananiara batanggimin salo Chief Minister-ni agangipa jean GHADC-o kam ka·giparangna November jaoni a·dok sorkarinigita dormahako jaanti on·a ku·chakgipa kattana aganskaaha.
GHADC-o kam ka·giparangna a·dok sorkari dormahako jaanti on·china dabienga ong·ja indiba batanggimin somoirangonin ja 43 ni dormahako on·chinasa dabienga jekon NPP-ni Executive Committee-chi chalaienga ine Marak aganaha. Indake so·sojengjeng ong·engani somoio jaanti dormaharangko on·a ku·chakaniara politics kal·e bon·chipatna am·ani ong·a ine bang·an jaksi ote aganenga ineba ua aganaha jeon ja 43 ni dormahako on·a maming ku·chakanirang dongjaha.
Marak-ni agananigitade ja 43 ni dormaharangko on·manani ja·manosa jaantini dormahako on·a ku·chakna nangachim. Indake ong·engon a·dok sorkarinigita dormaharangko on·a ku·chakaniara GHADC-o kajinako man·gipa department-rangko jako ra·na miksongani gnang ine Marak aganaha. Unbaksana Chief Minister-ni agangipa kattarangara GHADC-o kam ka·giparangni neng·nikani gimin maming ka·dongani kattako aganjaha batesa November jaoni dormaharangko a·dok sorkarinigita on·a ku·chake jingjengatenggiparangni dabianiko gualatna jotton ka·anisa ong·a ine Marak agandapaha.
