Garo Hills Autonomous District Council (GHADC) o ong·enggipa obostarangna United Democratic Party (UDP) ni Garo Hills region Youth Secretary an·tangni suk ong·gijaniko parakataha. Da·o an·ching council-ni sosojengjeng ong·aniko nikna man·enga aro indake apsan ong·angkuode bon·chongdikaona soknaba gnang ine Youth Secretary Arman G Marak aganangaha.
Council-ni CEM Albinush R. Marak-ni batanggimin chango adita official-rangko kamtangko ka·na changja betonkosan ra·chakna senge dongaia ine agangipa kattanaba Marak kusi ong·gijaniko parakataha. Ia kattarangko aganengon CEM an·tangan council-ni skotong ong·e ka·rimskarangna skie aro mesoke on·ani kamtangkode gualskahakon ine Marak janapataha.
Apsan somoion ia neng·nikanirangko namatna EC-ko chalaienggiparang krenge kam ka·jaengagita nikenga ine Marak parakataha. Iarangara ra·chakna man·gijagipa ong·a, Marak agandapaha. Uni gimin ia obostarangoniko naljokatchina UDP dolni palo ua didiataha. Re·baenggipa GHADC election-o uamangko seoke cholko on·genchimode council-ko namdapatna aro ia neng·nikanirangko ta·raken namatpilna kam ka·gen ine ua parakataha.
KHADC aro JHADC-ni Executive Committee-rango UDP dolni changa sapako nikmanaha aro apsandake Garo Hills-oba cholko man·ode ia ong·enggipa obostarangko namatgen ine Marak aganangkuaha.
