A·dokni poraienggipa bi·sarangna Chief Minister Scholarship Scheme (CMSS) 2025-ko a·bachengatna Chief Minister’s Conrad Sangma parakataha. Sangma, iako 2025-26 bilsini State Budget-ko parakatanio janapataha. Ia scheme-ko chatro chatrirangna chu·bata gadangrango poraianio dakchakaniko on·a aro pora skianiko namdapatna tariaha.
Scheme-ni ning·o eligible ba man·a kragipa Meghalaya-ni bi·sarangna a·doktango aro a·palchi poraienggipa class XI aro PHD gadangona kingking bilsiprako hajal 6 tangkarangko uamangni bank account-ona watatgen ine parakataha.
CMSS-o Meghalaya a·dokni poraienggipa bi·sarang maming sinjetani gri man·agita chatro chatrirang income-ko janapna nangjawa. Regular course-rangko sorkari, private aro a·song gimiko ra·chakgimin bida pakwatramrango poraigipa a·dokni chatro chatrirang scholarship-na galatna man·gen.
Scholarship-na galataniko 2025 September 1 tarikoni https://Meghalayaone.gov.in website-o online-gita ra·chakna a·bachenggen. Ia scholarship-na galatanio nanggipa document-rangara Meghalaya-o dongkamaniko mesokgipa card-rang jekai MHIS, MGNREGS job card, EPIC ba PDS card-rangko nanggen. Una agreba bilsi changsa skangni marksheet, gital passport size photo aro Skul, College ba University-ni see on·gipa bonafide certificate-koba on·a nanggen ine u·iataha.
