Bilsi sni skang bijoli nange donggipa Shillong Nongmensong-oni Iarapborlang Chyne Meghalaya a·dokna skanggipa blade runner ong·chengaha. Chyne uni dambemiting salrango 2018 bilsio bijoli nangako man·e jaksamgni aro ja·samgniko gimaataha. Da·o ua saksa para athlete ong·e bilsi 34 ong·oba Meghalaya a·dokni palo ia sports-ni a·bao skanggipa bak ra·gipa ong·anggen.

Chyne-na Physical Medicine and Rehabilitation (PMR) Centre dakchakaniko on·e skiaha aro ua da·o cha·na ringna, lekkao sena pen-ko jakkalna, unbaksana computer dokna sapaha. Ia centre uko blade runner ong·naba skienga. Chyne saksa marathon-osan an·tangko tariaigipa ong·genchimoba ta·rake katgipani gadangona tang·doatna skaniko parakangaha. Ua da·o paralympics-na an·tangko tarienga.

Chyne uni janggi tangani bidingo talatengon bijoli nanga ja·man a·bachengao neng·nikanirangko man·aniko parakangaha. Uni chanchianio ua re·mikkangani gisikona sokdojae jringjrotna palango dongkamna nanggen ine jajrenganikoba u·iatangaha. Da·o Chyne, NEHU-o donggipa Sports Authority of India, Sports Training Centre-o an·tangko tarisamsoenga.