Meghalaya a·doko adita bilsirangna tom·tome dongna man·engani gisepon bobil dakgipa dolrang a·bachengtaina miksonge manderangko rimnapanirangko daktaingaha ine Meghalaya pulis dolrang parakataha. Iani bidingo koborrangko law enforcement authority-rangona sokataha ine a·dokni DGP Idashisa Nongrang parakangaha.
Bobil dakgipa dolrang manderangko rimnapengaha ingipa kobor kakket ong·chongmota indiba iako sawa a·bachengdilenga aro baditana kingking manderangko bang·e rimnapengani bidingo name mancha talkujaenga ineba Nongrang aganangaha. Iani bidingo batanggimin somoio State Security Commission tom·anio Leader of Opposition Dr. Mukul Sangma janapangaha.
Dr. Mukul saksa Leader of Opposition ong·e bang·a dingtang dingtang koborrangni bidingo u·igipa ong·a aro ia bobil dakgipa dolrangona poraia skia donggipa donggija chadamberangko rimnapenga ine adita jarangna skangan janapangaha ine Nongrang aganaha. Una agreba dal·dale poraia donggipa chadamberang ia bobil dake chakatenggipa dolo napenba training-rangkoba ra·engaha ineba Dr. Mukul mikrakataniko on·angaha.
Iani bidingo a·dok sorkari u·igija dake donganiara namrengani ong·a aro kakketko niatgenchimode kenbegni ong·a ine Sangma aganangaha. Indake ong·engon bang·a poraia skia donggipa chadamberang kamrangko man·jae ka·o nange bobil dakgipa dolo napaona sokenga ineba sorkarina mikrakatjola gnang Sangma agandapangaha.
