College of Teacher Education (CTE), Rongkon, Tura-ni Auditorium Hall-o Drugs ba pekatgipa bostuni namgijaniko aro be·en bimangna nisiatani bidingo tale on·agita mikrakatani tom·bimonganiko ong·atangaha. Ia tom·bimonganio chatro chatri aro skigiparangna drugs aro gipin pekatgipa bosturangni namgijaniko aro iani a·sel songsalo ong·enggipa obosta rangni bidingo u·iatna ong·atangaha.
Ia tom·bimonganiona Tura Civil Hospital, Addiction Treatment Facility ni Amesa Chesrame S. Sangma mongsonggipa sokgipa ong·e drugs aro uni namgijarangni bidingo bak ra·anggipa manderangna ning·tue aganprake talate on·angaha. Ia tom·anio sepangjolo donggipa skulrangni chatro chatrirang baksana District Institute of Education and Training (DIET) ni chatro chatri rangba bakko ra·angtokaha.
Tom·anio A C. Sangma da·oni somoio donggipa dingtang dingtang drugs rangni bidingo talate on·angaha jekai niamni ning·o ong·gipa ta·maku, chu, sada, pan masala, vape, aro apsan dake niamni a·palo ba illegal ong·gipa ganja, heroin opioids, cough syrup rang aro chu rangni bidingoba ua agan talate on·angaha. Unbaksana ia bosturangko jakkalo mai dakgipa obostarangona sokatna man·ani, addiction ba watna man·gijani gadangrang, saani chin, a·selo ong·gipa mandeni bewal dingtangangani, HIV sabisini baridapani aro suicidal case ba an·tangko so·otanirang maini a·sel barienganikoba talatangaha.
Somoiko ra·e aganengon drugs baditana mandekosan ong·aigija, nokdangko aro songsalko nosto ka·na man·ani bidingo, niamni a·palo dos dakaona sokatani, songsalosan ong·aigija a·song gimikko nosto ka·an baksana re·baenggipa chasongni nisianiko ra·bana amanikoba talatange, chatro chatrirangko drugs oni chele dongna ku·pattiangan baksana janggi tanga gimiko pekatgipa bosturangoni gele dongchina didiangaha.
College of Teacher Education (CTE), Rongkon, Tura ni Principal Dr. Meena A. Sangma, tom·bimongani bako kan·dike somoiko ra·e aganengon, tomaniona sokgipa sakantikon mittelangan baksana skie on·anggimin kattarangko name kna·e gisik tangtango chipkame dongchina mol·molangaha. Dingtangmancha ua skul ni chatro chatri rangko maming saloba indakgipa bosturangko jakkaljachina aro an·tangtangko naljokate dongchina didiangaha.
