A·chik National Volunteer Council (ANVC) aro doloni bak ka·anggipa ANVC-B, Garo Accord ko ra·gatna Chief Minister Conrad Sangma ni dakchakaniko ANVC am·a. Garo Accord dingtang mancha Indian Constitution ni Sixth Schedule ni ning·o Autonomous District Council rangko bilakbatatna aro namdapatna miksongani ong·genchimoba ia Accord ko da·ona kingkingba chu·sokatna man·kujaenga ine aganangaha.
Batanggimin 2014 bilsio ia Accord ko New Delhi-o ua somoio ong·anggipa Union Home Minister Rajnath Singh, Minister of State (Home) Kiren Rijiju, ma·mong aro a·dok sorkarini dilgiparang baksa soi ka·giminko nirokate nanggipa ja·kurangko de·angchina Unified Group of Garo Accord Signatories (UGGAS) Chief Minister na chittio janapangaha.
Ia nangrimgimin dolko bikotaniara Indian Constitution ni Sixth Schedule ni ning·o Autonomous District Council (ADC) rangko mangrakbatatna ia Accord nigita chu·gimik bilo kam ka·na miksongani ong·a ine uamang parakataha. Iani bidingo batanggimin somoio jeo pangchake soi ka·giminko name dake nipiltaie ra·gatna man·agita Chief Minister baksa apsan tom·e chanchirimna somoiko on·chinaba mol·molangaha.
A·chikrangni nangnikanio pangchake ja·ku de·angna ma·mong aro a·dok sorkari baksa meligrike kamrangko ka·angna miksonganiko parakaton, iani bidingo ta·rakale tom·aniko ong·atchiba uamang aganangaha. Ia soi ka·gimin aro ra·chakgimin kattarangni a·palo ADC rangko dingtangatna kamrangko ka·jachinaba didiangaha. Iako dakanichi Garo Accord ko miksonge soi ka·anggiminko Constitution nigita pe·aniba ong·gen ine aganan baksana ia Accord ko ta·rakale ra·gate on·na man·agita ja·kurangko de·angchina mol·molangaha.
