District Hub for Empowerment of Women, Department of Social Welfare Tura, Jengjal Government Higher Secondary skulo Women Empowerment aro Drug Abuse-ni bidingo mikrakatani program-ko ong·atangaha.
Tom·bimonganiona Draisbon M. Sangma, Financial Literacy Specialist, DHEW, Tura, M.O.T. Sangma, District Social Welfare Officer, Tura, Chenziang N. Sangma, Gender Specialist, DHEW, Tura, Dr. Flora T. Sangma, Medical and Health Officer, Asanang PHC, Princewell Marak Inspector, Jengjal Police Station, aro Stern B. Marak, Supervisor, DSWO, Tura, sokenba bakko ra·enggipa chadamberangna adita skie talatan baksana mikrakatanirangkoba on·angaha.
Ia tom·anio dingtang mancha chatro chatri aro chadamberangna songsalna maidakgipa obostarang nengnikanirangko ra·baengachim, maikai uarangko champengna man·gen aro sorkarini scheme-rangni gamchataniko talatangaha. Ia somoio drugs jakkalaniko champengani bidingo aganan baksana be·en bimangna aro janggitangna namgijaniko on·ani giminba talatangaha. Una agreba One Stop Center-ni me·tra, ma·giparang aro me·chik bi·sarangna gamchataniko aro uamangna dakchakaniko ra·bana man·ani bidingoba agan talataniko dakangaha.
Apsan dake an·tangtangni janggi tanganio rongtal antale dongani cholrang aro uni gamchataniko chadamberangna skiangaha. Program-ni bako Beti Bachao Beti Padhao campaign-ni giminba adita u·i ma·sianiko talatangaha aro iasan ong·aigija me·chikrangna dongipa adita gamchatgipa sorkarini scheme-rangni bidingoba u·iatangaha.
