Ru·utgija somoirangna skang police-ni kamrangna seate matchotatgipa porikkani result-ni mark-rangko tol·e press release-rangko social media-rango giproroatenganiko Meghalaya Police Central Recruitment Board u·iataha. Porikkani mark-rangko Central Recruitment Board chapa ka·ata dongkuja ba parakatkuja ine board aganangaha.
Je manderang ba candidate-rang ia porikkako see matchotgiparang indake tol·e gatatgipa koborrango bebe ra·jachinaba uamang janapataha.
Meghalaya police-ni www.megpolice.gov.in official website-na agre darang gipin koborrango ka·dongjachinaba board u·iataha. Nanggipa koborrang jekai result-ni mark-rang ba press release-rangko ia portal-o aro koborrangko parakatimgipa a·damrango gatatgen ine uamang parakataha. Candidate-rangko indake tol·e parakatgipa koborrangoni simsake dongna aro giproroatjachina uamang mol·molataha.
