GHADC-o kam ka·giparangna ja 43 na kingking dormaharangko on·na man·jani bidingo jasana batpile office ko chipe jingjengataniko nikna man·ani gisepo dingtang dingtang political party ge·sa ge·gipin party ko jaksi ote dos galgrikanikoba niksona man·enga.
Batanggimin somoirango Executive Committee (EC) ko rikanggiparang nangana batpile kamna manderangko rimnapani a·sel ia obostarangko chagrongna nangenga ine Chief Minister Conrad Sangma matnangataha. Ia aganchakanina, Kharkutta aro TMC ni MDC Cherak Momin name dake am·sandianirangko dakani ja·mano aro sorkarini segatgimin report rango pangchake niate niode CM ni agananirang kakketsranggipa ong·ja ine aganangskaaha.
Momin ni agananigitade, batanggimin 2010 oni 2020 bilsiona pilak EC rikanggiparangan adita kamna rimnapanirangko dakangtokaha ine parakatskaaha. Iano pangchake niatgenchimode ge·sa political party mangmangko galone agananiara kragipa ong·ja maina pilak rikanggipa EC an daitorangko ra·na nangachim ine aganangaha.
Congress dolrangni somoio dormaharangko ja 4 na on·na bil man·anggijako nikgenchimode gital EC rikgiparang chu·gimik daitoko ra·e dormaharangko on·rikrikangna nangachim ine Momin aganangaha. “O·bitegipani gro nanggipako chawari chotchipgija dongode ong·gaigenma” ine ua mahari ma·drangni bewalrango toe agane sing·doangaha.
Una agreba da·o rikenggipa EC dormaharangko on·na sapjagenchimode uamangko biloniko ra·galchina dabian baksana a·dok sorkarinigita dormaharangko on·na miksonganikoba name dake talate on·chinaba dabiangaha.
