Garo Hills Autonomous District Council (GHADC) ko chalaienggipa National People’s Party (NPP) ni Executive Committee ko be·gruatna Tura ni MDC Bernard N Marak dingtang mancha Assam ni Chief Minister Himanta Biswa Sarma na chitti see mol·molataha. Bharatiya Janata Party (BJP) baksa nangrimgimin dolrang jean North East Democratic Alliance (NEDA) ni Chairman ong·eba Sarma re·dilangenga.
Bernard ni chittio janapatanigitade, NPP chi dilenggipa a·dok sorkari GHADC-o ka·na nanggnirangko chu·sokatna man·jae uamangni dakgualani kamrangna aro Garo Accord ko galchipe donanina dos donganiko nikna man·enga. Garo Accord ko re·anggipa 2014 bilsio a·dok aro ma·mong sorkari baksa dolgni bobil dolrangming soi ka·angaha jeon dolsako Bernard dilangaha.
Iako songgigrikaniara Meghalaya a·dokni District Council rangona jakgitel ong·e kam ka·na man·aniko ra·bapilna miksongani ong·achim, indiomangba a·dok sorkarini department rangko apjitatna, kajina man·aniko ra·rikanichi aro council ni chu·gimik bilo manderangna dangdike on·a ru·utatani a·sel da·onaba chu·sokujaenga ine Marak janapangaha. Iani a·sel GHADC-o tangka paisarangni bidingo be·gruaniko nikna man·enga aro kam ka·enggiparangna ja 43 ni dormaharangko on·na man·kujaenga ineba ua agandapangaha.
Ia pilakon nigrikate NEDA ni Chairman Himanta Biswa Sarma ko dingtang mancha GHADC ko chalaienggipa NPP ko be·gruate BJP na bilko on·skachina Bernard didiangaha.
