Garo Hills Autonomous District Council (GHADC)-ni ong·enggipa obostani gisepo sorkariko da·o chalaienggipa NPP party-ni kakketgijagipa kattarangko aganani bidingo West Garo Hills-ni District Youth Congress adita aganangaha. A·dok sorkariko chalaienggipa NPP dolrang changni chang batanggimin somoio Executive Committee (EC)-ko chalaianggipa Congress dolko matnange aganrongenga ine uamang janapataha. Indake ong·engon namedake am·sandianirangko dake nikaniode namen dingtanga ine uamang aganskaaha.
Congress dolni agananigitade, GHADC-o kam ka·giparang 2010–11 bilsio sak 917, 2011–12 bilsio sak 954, 2012–13 bilsio sak 1058, 2013–14 bilsio sak 1247, 2014–15 bilsio sak 1420, 2015–16 bilsio sak 1594, 2016–17 bilsio sak 1656, 2017–18 bilsio sak 1652, 2018–19 bilsio sak 1572 aro 2019–20 bilsio sak 1638 mangnigita tang·doaniko nikna man·a ine parakataha.
Nambate am·sandianirangko dakani ja·mano, bilsi 7-ni gisepon NPP dolchi dilenggipa EC-ni somoiosa GHADC-o kam ka·giparangko bang·en rimnapaha ine uamang matnangataha. Indake rang·san GHADC-o kam ka·giparang bariani a·selo tangka paisanigita neng·nikani aro jakkandilsretani ong·aha. Iani gisepon jako ra·e nanggipa ja·kurangko de·ani palo da·o chalaienggipa sorkari politics-o pangchake gipinkosa matnangenga ine uamang aganaha.
Garo Hills aro a·dokni manderang Meghalaya aro GHADC-ko name nirokange tom·tomanio aro namgipa cholko ra·bapilna man·gen ine NPP sorkario ka·dongachim. Indake ong·engon GHADC-o neng·nikanirangna ka·sachakani dongja aro chalaienggipa sorkarini choligijaniko mesoka ineba uamang aganaha.
Ia somoio GHADC-o kam ka·giparangna ja bon·piloba dormaharangko on·gijaniko ta·rake niatna nangenga jeon kam ka·enggipa aro uamangni nokdangrangni neng·nikaniko nikgenchimoba NPP dolrang maming dakchakaniko on·jaenga ine uamang janapataha. NPP sorkari GHADC-ni gimin simsakgenchimode uamang maming ru·utatagri dormaharangko on·china, somoigita aro jaanti hajirarangko on·china aro council-ko name rakkina gipinko matnanggija nanggipa ja·kuko dechina uamang dabiangaha.
