Da·al salni bako Tura-ni District Auditorium-o Career Guidance aro Counselling programme-ko Chief Minister’s Career Guidance & Counselling Scheme-ni gita West Garo Hills District Administration dingtang dingtang porikkarangna gisik nange tarisoenggipa chadamberangna oprake on·angaha.
Tom·aniona West Garo Hills a·jani Additional Deputy Commissioner, Florina Boro, MCS aro Department of Education-ni Nodal Officer, Brijesh Arengh mongsonggipa sokgiparang ong·e bakko ra·angaha. Apsan dake T.I.M.E. Institute ni Director Dr. Soumen Das, skigipa aro Personality Development Coach Jayanta Nath-a program-ona sokbaaha.
Ia Career Guidance coaching program ba skie on·ani session-rangko ia bilsini September jani 1 tarikoni Pechon Memorial Hr. Sec. School, Tura-o anti dokna ong·atangen. Skie on·aniko pring aro attam dake bakko rana sienggiparangni somoi meliako nigrike tik ka·aha. Session-o dingtang dingtang porikkarang jekai DSC, MPSC, SSC, Banking, CUET aro CLAT porikkarangni bidingo Guwahati T.I.M.E. Institute-ni sak 8 skigiparang ia anti dokni gisepo skie on·aniko dakangen.
Da·alni tom·bimonganiona a·jani adita dingtang dingtang skul, college, university aro mamanti porikkarangna tarie dongsoenggipa sak 600 na bate chadamberang program-ona sokbatokaha. Program-ni bako bang·a gisik nanggipa chadamberang session-rango dongna biming segate ra·angtokaha.
Coaching class-rang class X, XI, XII ni chatro chatrirangnasan ongaigija, Higher Secondary-ko matchotgiparang baksana Graduate rangnaba ong·gen aro iano bimingrangko segatnagita online aro offline form-rangko a·jani BDO Office aro DC Office-o man·gen ineba tom·ani bako agan talatangaha.
