Da·o ong·nasienggipa Meghalaya State Badminton Championship-o West Garo Hills a·jani palo bakko ra·na am·enggipa badminton kal·giparangna send off ceremony ba mande ra·e watataniko Tura Hawakhana Indoor Hall-o dakangaha.
Chang 40-gipa Meghalaya State Badminton Championship ko da·o August jani 20-23 tarikona Ribhoi a·jani Nongpoh songjinmao ong·atangenga. Ia kal·susaaniona West Garo Hills a·jani sak 26 chadamberang re·ange bakko ra·nasienga jeoni sak 10 me·chikrang aro sak 16 me·asarang gnang. Iamangan U13, U15, U17, U19 aro Senior category rango susagrikangen ine West Garo Hills District Badminton Association ni Organising Secretary aro Tura Badminton Coaching Center ni Head-coach, Salrak N. Marak Ku·rongdik kobor ra·timgipana parakangaha.
“Chinga bilongen rakbee kamrangko ka·enga aro ia chango chinga mija bilsina bateba Gold medal-rangko man·bana ka·dongsoenga ” ine Salrak N. Marak aganangaha.
Ia somoio a·jao ‘The Golden Boy’ ine mingkilakgipako man·gipa Sixbirth M. Marak na kal·susaani a·bao nambate, bimchimbe, gisik nange kal·anina aro mikkangchi nambata gadango bakko ra·nagita una dakchakenggipa Ma Donme Ch. Marak aro uni ripengskarang tangkarangko gilenba chu·gimiko gong hajal 45 ko on·gilaniko dakangaha. Ma Donme Ch. Marak ni agananigitade ia bi·sa bilongen kal·susaani a·bao pattia man·gipa ong·a aro ua a·dokosan ong·aigija national gadangonaba doangna ka·dongani donga ine ua aganangaha.
Ia somoio adita ring·salani a·bao changgipa sapgipa manderangba gitrangko ring·e dakmesokangaha.
