United State President Donald Trump Ukraine-ni President Volodymyr Zelensky-na Russia baksa dakgrikaniko dontongatna sikgenchimode dontongatna man·gen ine aganangaha. Truth social-o uni see parakatanio Eastern Europe chipak a·song ge·gnini gisepo donggipa Crimea peninsula-ko am·piljachina aro North Atlantic Treaty Organisation (NATO) o bak dongjachina Trump parakataha. Ia kattarangko Trump da·al sal Zelensky baksa Europe-ni gipin dilgiparangko grongna skang see janapataha.
Crimea, niamo pangchake Ukraine-ni ning·ao ga·aka jekon 1954 bilsio Soviet Union iamang a·song gegnini tom·tome donganiko gisik ra·nagita Russia-oniko Ukraine-na pakwataha. Indake ong·genchimoba 2014 bilsio Barack Obama-ni chasongo Russia-ni President Vladimir Putin Ukraine-oniko an·tangtangna a·kange ra·angtaiaha aro gipinrang sinjetaniko on·janagita raken beng·ataha.
Obama-ni dilengmitingo Crimea-ko Russia-na a·kange on·aha ine Trump matnangataha. US baksa bakrimgipa bang·a gipin dilgiparangba iani bidingo raka ja·kuko de·a dongjaha aro ja·manchake campaign-ko dakahaoba Russia-ni a·kanggiminko apjitatna man·jaha. Russia baksa dakgrikaniko Ukraine dontongatna sika ong·ode man·gen ba ua dakgrikangna sikuode dakgrikangkuaikan ine Trump uni seanio parakataha.
Da·al salo Zelensky aro unbaksa Europe a·songni dilgiparang jekai UK Prime Minister Keir Starmer, French President Emmanuel Macron, German Chancellor Friedrich Merz, NATO Secretary-General Mark Rutte aro EU chief Ursula von der Leyen White House-o gronganggen.
