Skotong songjinma Shillong-ona bijolini taxi-rangko ra·bana a·dok sorkarini tarisamsoaniko Chief Minister Conrad K. Sangma parakataha. Bijolini taxi-rangko ra·bana miksonganiara samtangtango donggipa bola-wa·a do·o-matrangna maming namgijako on·gijagipa aro motor chatgijagipa re·ruraani gari gorako jakkalaniko tang·doatna dakenggipani bak ong·a ine Sangma aganangaha.
Skanggipa changna bol 50 bijolini bus-rangko watatna am·enganikoba ua parakaha. Ian batanggimin chango STEMS-ni skul bus-rangko ra·bagipani bak ong·a jekon da·o sorkari bijoli bus-rangona ra·gatatskana tik ka·aha ine Sangma aganangaha. Ia bus-rangko ra·baani namgni aro namgijanirangko talatengon songjinmani samtangtango manderangna re·rurachakna donggipa ramakoba name taridape on·gen ine Sangma janapangaha.
Re·baenggipa somoirango a·dokni dingtang jillarangona jekai Jowai, Tura aro Nongstoin-ona bijolini garirangko sokatgen ineba ua u·iataha. Ia bus-rangko Prime Minister’s eBus Sewa Scheme-nigita a·dok sorkari man·gen. Neng·nikani bidingo aganengon manderang bus-o re·rurana ranta ka·jani a·selo gadona gong·rongja indioba da·o bang·a namgnirangko ma·sie godona a·bachengengaha ine Sangma janapangaha.
