Chang 79 gipa Independence Day ba jakgitelani salko skanggipa changna Captain Williamson Sangma State University-o manianiko dakangaha. Ia manianio University ni Vice-Chancellor Dr. Vasanthi Vijayakumar, Registrar A. Ch. Marak, IAS (Retd.), Finance Officer, aro University-o dingtang dingtang gadangrango kam ka·giparang bakko ra·angtokaha.
Ia maniako a·bachengatna Vice-Chancellor ni jakchi a·songni flag ba nisan ko songdoatangaha. Ia jakgitel ong·ani salko gamchate ra·ani bidingo aro a·songna on·kange kam ka·anggiparangko gisik ra·na nangani bidingo aganan baksana pilakan rasong chana nangani aro apsan ku·mong nangrime dongna nanganiko sokbana sakantikon mol·molangaha.
Ian skanggipa changna a·dokni ge·sa kamkamgipa State University-o indake jakgitel ong·ani salko manina cholko man·chenggipa ong·a. Chatro chatrirangna bida pakwatna ia bilsioni kulie a·bachengatna man·anian mikkangchi an·chingni chadamberangna adita neng·nikanirangoniko olgrokate cholrangko ra·baani ong·a.
