Unique Disability ID (UDID) scheme-ko West Garo Hills District Administration a·bachengataha ine ge·sa video-ko youtube-o upload ka·ani bidingo District Administration da·al salo talataniko dakataha. Ua video-ora je mandean UDID-na dorgasto gale japrako gong hajal 15 tangka paisarangko man·gen ine u·iataha jekon ‘Sanba Local Tv’ youtube channel-o upload ka·aha. Tarigimin video-o tangkarangko man·agita maming neng·nikani dongjaoba mikron nikani komia ingipa category-ko basee gapatchinaba skiaha.
Ia obostako skanggipa District Resource Centre on Disability Affairs (DRCDA), Tura, niksochengaha aro bakan UDID application-chi napange mikron nikani komia ine gapatgipa category-oniko mongsongbate songadam jolniko name sandiangaha. Indake ong·engon DRCDA nambate am·sandianganiko dakon bang·a dorgasto galgiparangan mikron nikani neng·nikani donggijagiparangsa ong·a jemangan video-o aganako ja·rikgiparangsa ong·a ine ma·sina man·angskaha.
Ia obostani bidingo District Administration raka ja·kurangko ga·e ia giprorogipa video-ni a·selo manderangna maikai jajaaniko ra·bana amaniko, tol·e agananina ka·dongsoaniko aro indake togianichi manderangni sorkarini programme-rango ka·donganiko gimaatani ong·gen ine janapangaha. Una agreba indake tol·e u·iatgipa kattarangko dale ra·jachina aro bebe ra·jachina u·iatan baksana mai dakgipa manderang ia UDID-ko man·a kraa uko jako ra·enggiparango name talchengchinaba mol·molataha.
