Bangladesh a·songoni a·dokona napsrukbagipa manderangko champengsona man·agita pilak Deputy Commissioner (DC) aro Superintendent of Police (SP) rangko mikrake dongchina a·dok sorkari ge·etangaha. Iani bidingo chanchirimna Home Department ni in-charge aro Deputy Chief Minister Prestone Tynsong, Budbar salo tom·angdilaha.
Ian batanggimin somoio Bangladesh oni sak 6 manderang silchi darerang baksa Rongdangai song-gita napbae dokan dakgipa mande saksako doke satangaha aro tangka paisa baksa gipin bosturangkoba cha·uangani gisepo ja·ku de·ani ong·a.
Indakgipa obostarangko adita biaprango chagrongani a·sel pilak DC aro SP rangko bimchipbate kamrangko ka·e nirokchina ge·etangaha ine Tynsong janapangaha. Niamgri napsrukbaanirang Bangladesh baksa sima ari donggipa pilak biaprangon ong·enga jekai East Jaintia Hills oni Garo Hills ni Dalu jolrangona kingking chagrongenga ine Tynsong parakataha.
Iani bidingo chinga namen mikrake dongenga aro napsrukbagipa manderangko champengsoe uamangko watatpilna police dolrango bil donga ine aganan baksana batanggipa somoio Bangladesh oni napsrukbagiparangko rim·a man·anikoba a·dok sorkari dingtang mancha report rangko tarie Ministry of Home Affairs (MHA) na watataha ine Tynsong u·iatangaha.
Police dolrangni u·iatanigitade, ia ong·anggimin obostao bak donggipa manderangara cha·una miksong manchae re·bagipasa ong·a ine u·ina man·aha. Mikkangchi BSF aro police dolrang apsan bakrime kam ka·anichi indakgipa obostarangko champengsona man·gen ine Tynsong uni ka·dongsoaniko aganangaha.
