Meghalaya State Education Commission-ni didiatako man·e commission-ni ku·pattiani aro chanchianirangko sokatnagita expert committee-ko songna a·dok sorkari tik ka·angaha. Ia kattarangko Chief Minister Conrad Sangma report-ko man·soani ja·mano aganangaha. Iani bidingo tom·anio Chief Secretary DP Wahlang, commission-ni member-rang aro official rang bakko ra·angaha.
CMO-ni parakatani gitade pakwatgimin report-o a·doko skia porani gadang aro ong·enggipa obostarangni bidingo janapaha ine u·iataha. Report-o bang·a dingtangatanirang jekai skulko mangrakdapatna, higher education o dingtanganiko ra·bana, chatrorangni pora skiani gadangko ra·dona aro adita tang·doatna nanggipa kamrangko janapataha. Ia report-ko dingtang dingtang educator-rang, changgipa sapgiparang aro skigiparangni association-rang baksa agan golporimani ja·mano tariaha. Ian policy maker ba niam retiko tarigiparangna aro gipin daito gnanggiparangna re·mikkangna ja·ku snalaniba ong·a.
Ia report-o Meghalaya State Education Commission-ni kamrang jekai skigiparangni dormaha man·gijanirangko nirokna, kamo rimnapanio ru·utaniko ta·rakdapatna, skul aro college-rangko mangrakatna, skia porani pilak gadangrango gun gnanggipa a·bako ra·gatna aro NEP-ni dongimin niamrangko ja·rikna nanganiko janapataha. Unbaksana skul, higher education, college, university, teacher education, training aro polytechnic rango dingtangatna nangani gimin kupattianirangko report-o ra·baaha.
Chief Minister Conrad Sangma tom·anio aganengon State Education Commission-ni gamchataniko janapaha. Mikkangchi pora skiani gadangko namdapatna, ia report-ko indin donaigija aro adimu gapketaona sokna nangjanagita dakna man·gipa kamrangko sorkari ka·gen aro commission-ni ku·pattiagitaan expert committee-ko songgen ine parakangaha.
