West Garo Hills a·jani chadamberangna sorkarini kamrangna aro CAT, CUET & CLAT porikkana tarisamsona man·agita Chief Minister’s Career Guidance Scheme-ni ning·o T.I.M.E (Triumphant Institute of Management Education) baksa bakrime training program-ko District Administration ong·atangna parakataha.
Ia career coaching aro counselling program-ko Tura-o anti dokna, Dalu aro Tikrikilla-o anti brina ong·atanggen. Chief Minister’s Career Guidance and Counselling Scheme-ni dakchakanichi a·jao donggipa chadamberangko tang·doatna ja·kurangko de·e kamko ka·angna miksonganiko aganangaha. Ia program-ko chu·sokatna T.I.M.E Shillong aro Guwahati-oni sapbegipa skigiparang kamko ka·angenga.
Ia program-ko a·jani ge·gni block-rang jean Dalu, Tikrikilla aro Tura songjinmao poraienggipa chatro chatrirangna sorkari kamni porikkana, CAT (Common Admission Test for IIMs), CUET (Common University Entrance Test) aro CLAT (Common Law Admission Test for NLUs) porikkarangna mikkangchina nambate tarisamsona man·a gita ong·atangenga. Ia Orientation ba agane on·aniko August 19 tariko Tura-o, August 20 tariko Dalu-o aro August 21 tariko Tikrikilla-o ong·atanggen.
Ia training program-o skie on·aniko IIT, IIM, NIT, AEC aro dingtang dingtang bida pakwatchakramni dilgiparang, chatro chatrirangko aptitude, reasoning, changa sapani aro pilak porikkarangna tarisamsoe dongna skie on·aniko dakanggen. Unbaksana skie ra·anio nambatgipa chatro chatrirangko scholarship-based-long-term coaching-na T.I.M.E Shillong-o skie ra·na seokaniko dakangjolgen ineba aganangaha.
